Opptaksreglar

Det er ikkje laga absolutte reglar for opptak til kulturskulen – altså reglar for kven som skal få plass og kven som må vente – når det er konkurranse om plassane (og det er det som regel).

Men nokre kriterium for kva som skal telje med ved vurderinga av opptaket, er laga (det var det for lengst avgåtte musikkskulestyret som gjorde det i si tid). Dei momenta som tel med når nye elevar skal plukkast ut frå søkjarlistene, er:

Om søkjaren har søkt før (står på venteliste)

Om søkjaren har vore elev i kulturskulen før (t.d. musikkbarnehage)

Alder

Kva instrument/disiplin det vert søkt på

Omsyn til gruppesamansetjing

Faglege ressursar i kulturskulen

Geografiske omsyn

Born i grunnskulealder (6 til 15 år i opptaksåret) vert prioritert (gjeld ikkje musikkbarnehage)

Kjønn (for å kvotere inn gutar sidan det er stort jentefleirtal i kulturskulen)

Det er ikkje sagt noko om kor stor vekt kvart av momenta skal ha, så ein del skjøn vil alltid vere med i biletet (skjønet er det i hovudsak rektor som utøver).

Men alder har større vekt enn søkjedato, slik at eldre søkjarar i mange tilfelle går framom yngre med tidlegare søkjedato.